Isabel Zendal, unha muller de Ordes, primeira enfermeira da historia nunha misión humanitaria internacional

 

 

Desde o Equipo de Igualdade do CPI Viaño Pequeno (Trazo), entre as actividades a desenvolver arredor do vindeiro 8 de marzo, Día Internacional da Muller Traballadora, propoñemos realizar unha aproximación a Isabel Zendal, unha muller de Ordes, primeira enfermeira da historia nunha misión humanitaria internacional.

Como primeiro bocado reproducimos este vídeo divulgativo (13´ 45´´) que desde maio de 2022 está dispoñible no sitio web do Consello da Cultura Galega e na canle de youtube deste organismo. A súa autora Carmela Cela fai un interesante retrato biográfico de Isabel Zendal, unha muller galega, orixinaria de Ordes, concretamente nada na Agrela (Santa Mariña de Parada, Ordes) o 26 de febreiro de 1773 e finada no Vicerreinado de Nova España (actual México).

Isabel Zendal está considerada como a primeira enfermeira da historia en participar nunha misión humanitaria internacional, pois participou na Real Expedición Filantrópica da Vacina (1803-1812), dirixida polo doutor Francisco Xavier Balmis co obxectivo de levar a vacina da varíola a América, coidando dos 22 nenos da Casa de Expósitos da Coruña que nos seus brazos levaban inoculadas cadansúa dose de vacina para combater a propagación da enfermidade da varíola.

Novelas: Esta historia real foi novelada en varias ocasións.

- Julia Álvarez, novelista dominicano-estadounidense, escribiu a novela Saving the World: A Novel. Nesta obra, unha escritora descobre as similitudes sorprendentes entre a súa propia existencia e a historia de dona Isabel Sendales y Gómez, que acompañará o doutor Balmis na expedición da varíola. En castelán foi publicada co título Para salvar el mundo (Alfaguara, 2007).

- Almudena de Arteaga na novela Angeles custodios (Ediciones B, 2010) converte a Isabel Zendal nunha das protagonistas da historia.

- Javier Moro reconstruíu na novela A flor de piel (Seix Barral, 2015) a historia da expedición da vacina a través da personaxe femenina de Isabel Zendal.

- A escritora galega María Solar no libro Os nenos da varíola (Galaxia, 2017) relata a historia de Isabel Zendal Gómez como directora do orfanato Casa de Expósitos e de como pasou a formar parte da expedición.

- E en banda deseñada ou cómic o álbum ilustrado, Novo Mundo. Isabel Zendal na Expedición da Vacina, con textos e ilustracións de El Primo Ramón ( Ed. Bululú, 2018) tamén conta a vida da enfermeira.

Películas e documentais:

- 22 ángeles, producido por TVE en 2016 e baseado na novela Angeles custodios. Dirixido por Miguel Bardem, con guión de Alicia Luna e protagonizada pola actriz galega María Castro no papel da enfermeira.

- Isabel Zendal, la enfermera que cambió el rumbo del mundo (2016) Un documental de Enfermería TV, televisión creada polo Sindicato de Enfermería, SATSE, e a Fundación para el Desarrollo de la Enfermería, FUDEN, realizado por Ana Fernández, Enrique Sierra e Javier González.

Na nosa biblioteca escolar:

No blogue da nosa biblioteca bibliotrazo.blogspot.com en cursos anteriores houbo varios alumnos e alumnas que comentaron brevemente o libro de María Solar (nesta ligazón) e tres deles realizaron cadanseu booktráiler que reproducimos deseguida. Son traballos de Ana Señarís Veiras, Valeria Vásquez Fernández e Miguel Mariño Martínez.

   

 

As actividades de Igualdade no xornal comarcal Primeira Noticia

Primeira Noticia, xornal da Comarca de Ordes que edita Óscar Fraga Garabato desde Sigüeiro (Oroso) e que recolle información dos concellos de Cerceda | Frades | Mesía | Ordes | Oroso | Tordoia | Trazo, publica no seu nº 41, de| decembro de 2022, unha crónica das actividades de Igualdade realizadas no CPI Viaño Pequeño (Trazo), con especial relevo para o Manifesto elaborado polo alumnado de 4º de ESO e que xa reproducimos aquí.

Agradecémoslle moito a Primeira Noticia a divulgación das nosas actividades.

Non é Non. Infantil e Primaria do CPI Viaño Pequeno no 25 de novembro, Día internacional da eliminación da violencia contra a muller

 

Nesta xanela de Igualdade = CPI Viaño Pequeno tiñamos aínda que deixar testemuño videográfico das fermosas e reivindicativas actividades realizadas desde Infantil e Primaria na mañá do 25 de novembro, Día internacional da eliminación da violencia contra a muller. 

No primeiro vídeo pódese ollar como todas e todos, alumnado e profesorado, deron en xuntarse no patio con cadansúa camisola negra, coa lenda Non é Non. 

E no segundo vídeo a creatividade amósanos os soños futuros de nenas e nenos que son compartidos en abrazos de igualdade. Non deixedes de visionar estas dúas pezas, que en breves minutos achegan mensaxes a prol da eliminación da violencia contra as mulleres. 

Parabéns!

Manifesto do 25 de novembro, Día internacional da eliminación da violencia contra a muller, elaborado polo alumnado de 4º da ESO

 

Ao mediodía do 25 de novembro, Día internacional da eliminación da violencia contra a muller, xuntámonos no patio para a lectura dun Manifesto elaborado polo alumnado de 4º da ESO, que podedes escoitar no vídeo nas voces de Lúa, Raquel e Román. 

Tamén podedes ler deseguida o texto elaborado e despois seguir o minuto de silencio en emocionado recordo das vítimas.

MANIFESTO

O Manifesto debería ser todos os días e non só o 25 N. (voz de Román)

Queremos non ser xulgadas por ser Nós mesmas. (voz de Raquel)

Queremos saír á rúa sen medo, non ter mandar unha mensaxe máis de que chegamos ben á casa. (voz de Lúa)

Queremos non ser acosadas, nin nas redes nin na rúa. (voz de Raquel)

Non queremos ser maltratadas, violadas e asasinadas por ser quen somos. (voz de Lúa)

Queremos ser respectadas nos nosos traballos. (voz de Raquel)

Queremos poder sentirnos seguras e non ser silenciadas. (voz de Lúa)

HOXE POR MIN, MAÑÁ POR TI (Todas as voces)

Vídeo de Sara Gómez García (3º ESO A), primeiro premio do «I concurso de vídeos Trazo de fronte ás ciberviolencias machistas», convocado polo Concello de Trazo

 

E a mañá do 25 de novembro, Día internacional da eliminación da violencia contra a muller, tivo a súa continuidade cando a alumna Sara Gómez García (3º ESO A) foi recoller, acompañada de todo o alumnado dos dous grupos de terceiro, o primeiro premio do «I concurso de vídeos Trazo de fronte ás ciberviolencias machistas», convocado polo Concello de Trazo, que podedes visionar premendo na imaxe superior.

Os nosos parabéns a Sara polo premio e ao alumnado que participou na iniciativa!👏👏

 

25 DE NOVEMBRO. DÍA INTERNACIONAL DA ELIMINACIÓN DA VIOLENCIA CONTRA A MULLER: ANTES DE SAÍRMOS DAS AULAS

 

Hoxe é 25 de novembro, declarado Día internacional da eliminación da violencia contra a muller, e nesta data senlleira nace este blogue Igualdade = CPI Viaño Pequeno, creado polo Equipo de Igualdade do noso centro educativo e ABERTO á colaboración de toda a comunidade escolar.

E abrimos esta xanela coa conmemoración realizada hoxe no CPI Viaño Pequeno, mais para calquera actividade sempre é importante a preparación previa e nas imaxes superiores podemos ollar algúns exemplos do traballo previo realizado polo noso alumnado e profesorado nos preparativos ou no resultado das imaxes e lemas que estamparon nas súas camisolas negras.

Un forte aplauso polo voso compromiso! 👏👏